Cart 0
Cine Cine Impelelekesho e ko ili (Bemba)

Cine Cine Impelelekesho e ko ili (Bemba)

$0.00

Umuntu tali no kutabataba pano isonde, pantu umweo wakwe wa nshiku shinono, no bupulumushi e po buli. Imyaka yesu yaba kwati kulukuta kwe bula no kulukuta kwa minsoshi. Tatwakwata myeo INGI kano umo wine fye. UMO FYE E 0 TWAKWATA. Tufinye umweo wesu pano isonde lyonse tuli kuno, twilatabataba iyo.

Ubushiku bumo kafundisha mukalamba atile ku mulumendo, “Bushe wapwisho kusambilila amasambililo yobe ilelo?” Amwaswike ati, “Ee lelo line napwisha”. Kafundisha: “Nomba walacita nshi? Umulumendo: “Nakulabombe milimo iyo nasambilila kwi sukulu; nkopo mwanakashi musuma; nkanonko bunonshi ubwingi no kuilumbusha mu calo.”

Kafundisha: “E lyo ukacita nshi?”

Umulumendo: “Nkaleke ncito no kulaenda konse uko ntemenwe, no kwikalo mutende.”

Kafundisha: “E lyo ukacita nshi?”

Umulumendo: “Nkakota, lelo ndecetekelo kuti nkekalo mutende nangu ningakota.”

Kafundisha: “E Iyo ukacita nshi?”

Umulumendo: “Ndeti ndi no kufwa ukulingana ne ficitika pano isonde.”

Kafundisha: “E Iyo ukacita nshi?”

Awe umulumendo ubulaka bwamushinkile; takwete ca kwasuka iyo. NGA IWE we kabelenga wandi?

Bushe kuti wayasuka? Bushe abantu abengi ni cikanga bonse, tabatontonkanya ngo mulumendo tulumbwile? E fyo batontonkanya nangu baishibo kuti imfwa tayaishibikwa no kuti ili konse konse no kusangwa ku fifulo fyonse. Inshishi shesu shilanshininkisho kuti imfwa ili mupepi. Tusokwe ku mashiwi ya Mupusushi aya kutila, “E ICO NA IMWE MUBE ABAITEYANYA; PA KUTI UMWANA WA MUNTU AKESA MU KASHITA MUSHIKASHILE.” (Mateo 24:44).

“lngileni pa mpongolo ya kamfyemfye: pa kuti impongolo yasalala, kabili inshila yapabuka iitwala ku boni, kabili BENGI abengilako. Lelo inshila iitwala ku mweo ya kamfyemfye kabili yalifyenenkana, kabili BANONO abaisanga.” (Mateo 7:13-14). Umuntu wa fyuma uyo Lesa alengele ukushuka, atontonkenye mu mutima wakwe, ati, “We mutima uli ne fisuma ifingi ifikalaluke myaka ingi; utauluke, ulye, unwe, usangalale.” Lelo Lesa atile kuli wene, “WE WATUMPA, BUNO BUSHIKU UMUTIMA OBE BALELONDOLA KULI IWE; ne fyo upekenye fikaba fya kwani?” E fyo cili ku uleibikilo mwine ifyuma no kukanaba uwacindama kuli Lesa. (Luka 12:16-21).

“E ico mwisakamikwa amuti, Tulelya nshi? nalimo, tulenwa nshi? nalimo, Tulefwala nshi? (Pantu ifi fyonse e fyo Abena fyalo bafwaya). Pantu Shinwe wa mu mulu aishibo kuti mukabile fi fyonse. Lelo mubale mufwaye ubufumu bwa kwa Lesa no bulungami bwakwe, ne fi fyonse fikalundwako kuli imwe.” (Mateo 6:31-33). Wa nshi umuntunse? Lesa nayasuka, ati, “Umuntu onse uwashangila, mupu fye.” (Amalumbo 39:5).

“Conse icikesakonkapo mupu.-Samwa mu bulumendo bobe, we mulumendo, no mutima obe ukusekeleshe mu nshiku sha bulumendo bobe; wende na mu mibele ya mutima obe, na mu mimwene yonse ya menso yobe; lelo wishibe ukuti pali conse ici Lesa akakwingisha mu kupingulwa. Kabili fumyo kufitwa ku mutima obe, no kutalusho kukalipwa ku mubili obe, pantu ubulumendo no kufita kwa mushishi mupu.” (Lukala Milandu 11:8-10). “Mwilufiwa, Lesa tashentekwa; pantu ico umuntu abyala e co akalobolola. Uubyala ku mubili wakwe wine, ku mubili akalobololako ukubola; lelo uubyala ku Mupashi wine akalobololako umweo wa muyayaya. (Galatia 6:7-8).

Mukwai, bushe ulefwaisho kukwato mweo wa muyayaya? Shikulu Yesu Kristu, atile, “LOMBENI, cikapelwa kuli imwe. FWAYENI MUKASANGA. Kunkunsheni CIKESWILWA kuli imwe: pantu onse uulomba alapokelela; no ufwaya alasanga, no ukunkunsha CILAMWISWILWA.” (Luka 11:9-10). Ico Lesa alelolela muli ifwe ni ci: KUMUCETEKELA KWA CINE NO KULAPILA KWINE KWINE. “Lapileni, tetekeleni imbila nsuma.” (Marko 1:15).

“Mwipalana no bwikashi buno; lelo musangulwe mu kulengwa kwa mitima yenu ipya, ukuti mulinge icabo kufwaya kwa kwa Lesa, icisuma kabili ica kutemuna, kabili icapwililila.” Roma 12:2. Yesu atile, “Impanga shandi shumfwe shiwi lyandi, na ine nalishiishiba, na sho shilankonka: na ine mpela kuli shene umweo wa muyayaya; kabili nangu umo takashisompole mu minwe yandi. (Yohane 10:27-28). “BONSE abo Tata ampela BAKESA kuli ine; no uleisa kuli ine NSHAKAMUTAMFYE.” (Yohane 6:37).

Pakapite imyaka inono,
Pakakonke nemyela inono,
Tukaba nabo abasendama,
Abasendama munshishi shabo.
Kanshi mweshikulu mpekanisheniko
Umupashi wandi kuli ubo ubushiku bukalamba,
Nsamfyeni mumulope wenu uwafina,
Mfumyeni imembu shandi.



More from this collection